قْبَرْ مْشَيِّدْ وْ لا حْياةْ غْبِينَهْ
وْلا عيشةْ المَرْهُونْ في تِرْكِينَهْ
*******************
قْبَرْ مْشَيِّدْ
وْحُفْرَه وْلَحْدَه والتْرابْ مْوَسِّدْ
وْساعاتْ حَرْقَه في البْحَرْ الْ يِهْرِدْ
وْساعاتْ حرْقْ النَّارْ في جْواجِينا
وْ بالقازْ والمَزُّوطْ نارُو تَصْهِدْ
وْ يِشْعِلْ مُحَمِّدْ والخْبَرْ يْجِينا
********************
وْ تِشْعِلْ النَّارْ وْ تِسْرِجْ
وْ في حَرْقْتُو سَامُورْها يِتْأَجِّجْ
وْ جَمْراتْها شْبَابُوا صْغِيرْ مْحَرِّجْ
وْ زِينَاتْها ثَوْرَه عَلْ يُظْلُمْ فينَا
وْدُخَّانْها قُدَّامْ الوِلايَه يْعَجِّجْ
عْلى خُوفْنا عْلى مُوتْنا بِيدِينا
******************
عْلى ذُلْنا ورْخُسْنا
عْلى خْضُوعْنَا عْلى عارْنا كي بِعْنَا
بِعْنا الحُرِّيَّه وْفي الحْفُرْ رْقِدْنا
حْفُرْ جَهْلْنا وْخِذْلانْنَا وَ رْضِينا
عْلى قَهْرْنا عْلى فقرْنا كي جُعْنا
جوعْ الكَرامَه والحَياةْ نْسِينا
********************
هاذاكْ وِلْدْ الحُرَّه
ولْدْ الشْرِيفَه العاتِيَه بالمَرَّه
ولدْ الصْيُودَه الدَّامِيَه في الكَرَّه
ولْدْ الوْطَنْ العْزِيزْ فيهْ غْلِينا
ولْدْ الرْبُوعْ الباهِيَه والمُرَّه
أَرْضْ الشَّهامَه والقِيَمْ الزِّينَه
*********************
شَعِّلْ عْلِينا جَمْرَهْ
وَبْعَثْها لْبُرْجْ السْمَا كي القَمْرَه
رُوحُو حْرَقْها ضْوِتْ كيفْ البُهْرَه
ضَوِّتْ عْلِينا اللِّيلْ فيهْ حْيِينا
وبْعَثْ مِنْها طْشَاشْ نارُو حَمْرَا
شَعِّلْ عْلِينا حْرِيقْ في جْواجِينا
**********************
شِعْلِتْ النّارْ وْ زِهْرِتْ
والحُرْ يَعْرِفْ كارْها كي سِرْجِتْ
ويَعْرِفْ بْلادُو فَزِّتْ حْمِتْ وْ قِفْزِتْ
وبالصُّوتْ هَزِّتْ والفْرَجْ يْجِينا
وْخَرْجِتْ الغُصَّه مالقْلُوبْ وْ فِزْعِتْ
وْقالِتْ رْجالْها بَاسْطَه يِزِّينَا
***********************
ورْجالْ قالِتْ يِزِّي
وْبَرْشَا نْسَا حُرَّاتْ قالُوا فِزِّي
فِزِّي بْلادِي هِيلِي وْ مِلِي وْ دِزِّي
دِزِّي الظْلامْ وْنَحِّي الهَمْ عْلِينا
وْ حِزِّي عْلِينا حِزِّي عْلِينا حِزِّي
نَحْنَا بْناتِكْ واجْبِكْ تِحْمِينَا
مِالسِّرْقَه تِحْمِينا
مِالنَّهْبْ مالفَسَادْ بيهْ بْكِينا
مالسِّجْنْ مِينُّو قَيْدْ فِيهْ يْدِينا
والبَطْشْ بَرْشا والحْياةْ مْهِينَه
مالقَمْعْ والإِرْهابْ بيهْ عْيِينا
مالعَفْسْ والتَّهْمِيشْ والمَاشِينَه
***********************
هَذِي ماشِينَه تِدْرِسْ
تُشْفُطْ وْ تُسْرُطْ وْ تَرْجِعْ تْدُورْ وْ تِدْهِسْ
والفُمْ فِيهْ لْسانْ دِيما يَلْحِسْ
وْساعاتْ ذَرْ رْمادْ في عِينِينا
وْساعَاتْ جُغْمَه حتَّى مَاهَا مْدَلْغِسْ
باشْ نَغْسْلُوا الدَّمْعاتْ عْلى خُدِّينا
***************************
هَذِي ماشِينَهْ تْخَرِّبْ
اخْضِرْ وْ يابِسْ كُلْ شَيْ مْعَطِّبْ
تَعْلِيمْ بارِكْ وْ صَحَّه مْرَضْ مْعَلِّبْ
وشْبَابْنا اللِّي الكُلْ عْلِيهْ شْقِينا
بَطَّالْ عاطِلْ يائِسْ وْ مِتْعَذِّبْ
ياخْسَارْتُو يا خْسَارْةْ آشْ رَبِّينا
*************************
وْ حَتَّى الصَّحافَه ضَاعِتْ
الحُرِّيه والتَّعْبِيرْ فِيها تْبَاعِتْ
وْ حَتَّى القَضَا اسْتِقْلاَلِيتُو ماعِتْ
وَلاَّ سَجِينْ وْ حَسْرْتُو دَفِينَه
و القَاضِي اللِّي شْرِيفْ وْ نَزِيهْ وْ ثَابِتْ
يْهِينُوهْ و يْذِلُّوهْ في الماشِينَه
يا ناسْ خَا نْبَلِّغْكُمْ
تُونِسْ الحُرَّه الغالِيَه تْقُولِلْكُمْ
مُحَمِّدْ وِلْدِي دَمْكُمْ ولْحَمْكُمْ
تِصْهَدْ صَهْدْ النَّارْ في الماشِينَه
وْرايْ حَرْقْتُو كانِتْ عْلَى خَاطِرْكُمْ
باشْ تَنْهْضُوا و تْعَبْرُوا يِزِّينا
************************
حَرْقْتُو عْلى خاطِرْكُمْ
حَرْقِةْ غَضَبْ لْكُلْ واحِدْ مِنْكُمْ
لِلإِنْسَانْ الْمَقْهُورْ في داخِلْكُمْ
للتُّونْسِي في الرِّيفْ والمَدِينَه
لِحْقُوقْكُمْ لِعْقُولْكِمْ لِشْرَفْكُمْ
لاَعْمالْكُمْ لاَحْزابْكُمْ لِلْمِينَا
************************
رايْ حَرْقْتُو شِعْلِتْ عْلَى بُقْعِتْها
وامِّيمْتُو تِشْوِتْ في كِبْدِتْها
باشْ تاخُذْ الصَّحَافَه حُرِّيِتْها
و تْوَلِّي كُلْ حْقُوقْنا في يْدِينا
وبْلادْنا تِبْنِي مَدَنِيَّتْها
عْلى سْيادَةْ القانُونْ بِيهْ عْلِينا
***********************
باشْ تَرْجِعْ الحُرِّيَّه
والتَّنْمْيَه تْوَلِّي ماهِيشْ مْزِيَّه
وْتِتْحَرِّرْ المُنَظْمَه والجَمْعِيَّهْ
والهَيْبَه ولاِسْتِقْلاَلْ لْقَاضِينا
والرَّابْطَه وْ حَتَّى الدِيمُوقْراطِيَّهْ
وْ خِيرَاتْ البْلاَدْ تَرْجِعْ لِينا
يا وْلادِي اسْمْعُونِي نْوَصِّيكُمْ
راوْ دَمْ الشُّهَدا بِينْ يْدِيكُمْ
وْ حَشَّادْ رَاهُو حَيْ يُخْزُرْ لِيكُمْ
لا تْسَلْمُوا في حَقْ وَاحِدْ فِينا
وْكُلْ واحِدْ ماتْ باشْ يِفْدِيكُمْ
رَاوْ دِينْ نِحْمْلُوهْ في رْقَابِينَا
عبدالله بنيونس ( مكثر 26 / 12 / 2010)
